今天。應該很高興

人大咗，學懂凡事不再睇重得失，自然可以冷眼看世界，輕鬆自在。所以，不只今天應該很高興，係天天都要令自己高興。

一個好的餐廳名字總會吸引到第一吓的注意力，高興，人人都想用餐時與親友共聚共享美食能有高興的心情。餐廳乃近期熱點，老公與我都襯熱鬧去高興一下。

星期六的黃昏真係好熱鬧，諗唔到工廈入面都有咁多人，如果再遲少少去更加要等位。餐廳裝修帶有懷舊風，一邊係妹妹理髪廳，另一邊有霓虹光管的小舞台。
 

餐牌有小食沙律意粉飯烏冬all day breakfast扒類甜品，定價最貴的扒類百多蚊，其餘都係百元以下，價錢吸引，又唔收加一。

大蝦柚子沙律比想像中大碟，大蝦已去腸，難得的心思，大蝦肉質十分爽脆。沙律菜份量很多，調味汁相對上份量有點不夠，柚子亦相對上份量較少。

松露雜菌意大利飯中的飯粒已全熟，但亦唔會好腍身，芝士松露味道香濃，老公同我兩人好快已經清碟。

昆布菜甫大蝦意大利粉配搭好fusion，大蝦同沙律用料相同，大隻爽脆。昆布菜甫帶有丁點鹹味，意粉用辣椒炒香，有點越食越辣的感覺，配搭新奇但煮法唔算複雜，又可以偷師。

見到餐牌有有機梳打水，好奇之下叫咗薑同血橙味。薑味梳打味道直情同薑啤一樣，辛辣味被甜味完全中和，血橙梳打亦略甜。

檸檬酸忌廉楓糖班戟，兩塊班戟中間鑲有檸檬片，裝飾成份居多，旁邊再有檸檬片，可以擠出檸檬汁點食。酸忌廉味道輕盈，食味更似乳酪。班戟唔係依家時興的空氣感，質感比較厚實，食落有種懷舊的感覺。

兩人大吃一餐唔使三百蚊，以觀塘工廈定價十分便宜，裝修又花上心思，難怪客似雲來。