大熱龍蝦包加忌廉咖喱烏冬

從臉書上睇到朋友食Day and Nite by Master Kama嘅龍蝦包同吉列牛排配忌廉蘋果咖喱烏冬，心生羨慕，之前朋友其實喺首爾弘大已經食過吉列牛排配忌廉咖喱烏冬一次，食過返尋味返到香港再食。睇睇地址原來餐廳開喺山東街，咁近返工平日夜晚都可以試吓滿足自己慾望。

餐廳平日夜晚全滿，喺門口都等咗一陣，通知有位再搭電梯上二樓用餐。餐廳原來分開日間同夜間餐牌，唔怪得叫Day and Nite。




心中一早已決定食龍蝦包同吉列牛排配忌廉蘋果咖喱烏冬，再加多一個龍蝦玉子燒，另叫飲品Master Magic Soda。

飲品先上，藍色梳打內有支試管裝有黃色檸檬水，侍應話將檸檬水倒入梳打內，可以唔使成支倒晒。黃加藍變紫，感覺好似做實驗咁，飲落梳打味道好清新，唔太甜，幾解喝。


龍蝦包好有氣勢，用木板上，除龍蝦包外，仲有炸薯條番薯條同沙律。龍蝦包同一般三文治唔同，係暖嘅同用上排包，排包搽上牛油焗脆，切開麵包夾入龍蝦肉，龍蝦肉相對上略少，不過對於麵包控如我，食排包已經非常美味，龍蝦肉鮮甜彈牙，有畫龍點睛之效。

炸薯條番薯條熱辣辣，點上絕配茄汁好食得無話可說。

吉列牛排忌廉蘋果咖喱烏冬牛排同忌廉咖哩烏冬分開上以保持吉列牛排的酥脆，牛排切開差不多全熟，炸得略為有點硬。另一碗忌廉放上咖喱烏冬放底，一夾烏冬時可同時沾上忌廉同咖喱。忌廉冇睇見咁溜，質感好輕好軟滑。咖喱加入蘋果味道似日式咖喱，甜味多於辣味，烏冬好煙韌，成個配搭好match好有新鮮感。

另一以龍蝦作主打的玉子燒內有粒粒龍蝦肉，玉子燒本身剛煮好非常熱辣，味道帶少少甜味。龍蝦肉同之前龍蝦包一樣鮮甜彈牙，如果有更多龍蝦肉就更加好。

整體上感覺侍應都斯文有禮，因為我地得兩個人，當時冇枱佢俾咗張四人卡位，話如果有二人枱會幫我地轉番，佢事先得到我地同意先安排坐位，同埋其他侍應說話清楚，又唔會太大聲，對於年輕侍應嚟講都算難得。