中泰越菜新館

印象中旺角一帶食越南菜的餐館不多，億饍喺窩打老道近廣華一段已有易拉架宣傳，寫著中越泰菜，中泰菜興趣都不多，唯獨是越南菜好耐都未食過，近近地又行去試吓。

雖然係假期前夕，但時間尚早，人客不多，安坐後已奉上中國茶，可以唔使再叫其他飲品。

牙車快係越式雞絲沙律，雞肉拆絲放喺椰菜絲上面，清爽中帶有微微辣味，作為前菜都唔錯。

軟殼蟹牛油果卷中嘅軟殼蟹炸得有點過火，牛油果片亦有點太生，尚未熟透，略為遜色。

串燒安格斯牛肉肉質腍滑，牛味尚可，加點沙嗲醬就更加畫龍點睛。

蔗蝦估唔到咁大支，有炸熱狗咁大，就算切開兩半，每人一支都有點太多，一人半支就夠。啖啖蝦膠肉十分鮮味彈牙，食完再咬吓蔗吸吓蔗汁真係幾正。呢個蔗蝦好有驚喜。

香芒蟹肉炒飯芒果香甜，蟹肉鮮蝦都落咗唔少，飯炒得乾身，調味亦剛好鹹淡適中，炒飯份量很大，每人起碼有兩三碗。

見到之前芒果香甜，叫咗個芒果糯米飯作為甜品，可惜呢個芒果帶酸，只好將芒果同椰汁糯米飯同食將椰汁甜味同糯米飯煙韌中和芒果的酸味。芒果糯米飯其實賣相不錯，芒果用心擺設，只可惜芒果唔甜。

作為新開食店，部分食品可以作為亮點，亦有部分食品有改善空間。