大件抵食之選

野玩系列除咗山店田店仲有海店，上山落田落海全部玩齊。野玩海店以海為主題，裝修都以水上活動、巨型吹氣龍蝦及沙灘景觀來切合。




餐牌除咗有一人及二人套餐外，仲有沙律、小食、薄餅、意粉、炒飯、海鮮、扒類同甜品，選擇好多。龍蝦似乎係主打，有焗龍蝦、龍蝦炒飯、龍蝦薄餅、龍蝦意粉，亦有二人焗龍蝦餐，取價398，有沙律、湯、焗龍蝦配海鮮、野玩薄餅、甜品同飲品，好似幾豐富，就點選呢個再加其他小食。


雜菜沙律同餐包中有黑橄欖，令我十分驚喜，自問係黑欖控，一次過可以食上幾十粒。黑欖加入其中可以提升食物的味道。

雜菜沙律的器皿係凍嘅，應該係連沙律一齊雪，沙律菜新鮮爽脆。

黑欖包拎上手係熱嘅，感覺到餐廳係有誠意做好每一樣食物。

雜菜湯微酸番茄味濃很對胃口。

餐飲加20蚊可轉特飲，青瓜青檸梳打上枱時嚇了一跳，杯身足有手臂咁長，份量真係珍寶級，飲果時要企起身先飲到。梳打飲到清新青瓜薄荷味，反而冇乜青檸味，不過以份量計真係好抵飲。


小食炸軟殼蟹有兩大隻切開兩半，以軟殼蟹計真係好大隻，蟹蚶入面仲可以食到肉，蟹身肉多有膏，外面唔會炸得好硬好厚。

野玩薄餅唔厚唔薄，批邊略硬，材料豐富，最特別有墨西哥辣椒，辣味沁入薄餅。

主菜焗龍蝦等咗一陣終於出場，焗原隻龍蝦好有氣勢，用較剪剪開可以完整食到成條肉，龍蝦肉鮮甜彈牙，一口食成條龍蝦肉好滿足。其他海鮮如大蝦青口蜆各有兩隻，青口蜆焗得有點乾，失去咗海鮮鮮甜味，蝦因為有殼包著尚算肉質彈牙。栗米同薯塊本身味道就帶點點甜味，但大蒜汁食不出有任何蒜味，反而似黑椒同咖喱汁混合體，個人不太喜歡此汁味道，同埋覺得個汁唔一齊焗另外分開上可能比較好。

 

總括而言，份量屬大件抵食，個別食物做法味道可以改善。