二百以下的韓燒放題

韓燒逐件肉計錢其實都幾貴，兩個人燒閒閒地一千幾百，都咪話唔肉赤。友人告知平昌Premium有韓燒放題價錢198，睇過餐牌有豬牛雞海鮮熟食覺得都食得過，孖老公兩人搵日燒一燒。

韓餐少不了的前菜有五款之多，秀珍菇白菜比較少見，多款蔬菜可是平衡一下韓燒肉食。

前菜另有一款已調味沙律菜，沙律菜新鮮爽脆，味道不錯。

韓燒肉食少不了，LA牛肋骨厚薄適中帶骨容易燒，牛味不錯，都叫咗兩轉。

雞翼比較難燒，外皮容易燒燶，只好放棄雞皮，幸好雞肉依然嫩滑美味。

梅頭肉一件過比五花腩瘦得多，雖然油脂不多，不過同五花腩一樣咁易燒，係怕肥的好選擇。

梅頭肉同五花腩冇骨，燒熟剪成一舊舊，包生菜食唔肥膩好清新。

海鮮方面，居然有貴價的燒鰻魚，鰻魚已加甜汁煮熟，放入爐只不過係煮番熱而已。

燒青魚十分驚喜，燒熟後皮脆肉滑又有魚油，食味同日式燒青魚差不多，只差冇蘿蔔蓉點汁。

魷魚圈好快熟，煙煙韌韌口感不錯。

燒元貝同蠔要有耐心，但唔好燒過火，否則又縮水又韌。

熟食款式都唔少，辣泡菜湯滾熱辣帶酸，材料豐富，有泡菜豆腐豬肉，細細的可以一人一鍋。

韓式什錦飯雖然迷你，配菜一樣豐富，喜見係生雞蛋，伴上韓式辣醬味道正宗。

見到有冷麵亦叫上一客，冷麵冰爽酸瓜絲青瓜絲爽脆，可以為韓燒下下火。

飲品自助，一般韓式飲品如樂天罐裝飲品都有。

二百以下的韓燒放題真係好抵食，間中一食都唔錯。