特色品味甜酸苦辣鍋

最近同父母電話閒聊，佢地話見報紙介紹圃鍋，係農圃集團新成員，想去試吓打邊爐。難得父母提議，自問冇睇到報紙報道，唯有上網睇下，原來圃鍋係新開，食評數量都不多。打電話去訂位順道訂埋鍋底甜酸苦辣鍋，因為上網睇話要早一日前預訂。

餐廳位於灣仔同銅鑼灣中間，集成隔離。搭電梯上到四樓，門一打開，第一眼就見到大紅燈籠高高掛，好有外國人眼中的中國風，餐廳裝飾比較fusion感強。



上火鍋前叫咗餐前小食七味脆豆腐，豆腐外脆內嫩，好似山水豆腐咁。外層唔會炸得好硬，成個殼咁，好有驚喜，父母亦讚好，對之後的火鍋有啲期望。
 


甜酸苦辣常比喻為人生，想唔到有餐廳將之變成為四式湯底。甜酸苦辣鍋分開四格，甜係番茄秀珍菇大蜆上湯，酸有酸菜豬骨，苦主要係苦瓜，辣就有乾辣椒花椒豬紅，四款都真材實料，各具特色，人多不失為一個好選擇。

打邊爐必食肥牛可以選擇精選牛肉拼盤，有好幾個牛嘅部位，個人比較欣賞大片牛肉卷成卷狀插在碎冰上，牛肉卷放入鍋中熱湯滾起時會將之攤開，牛肉雖然大塊，但入口牛肉味香濃又無渣，配麻辣湯底連豉油都唔使點。

清酒黑豚肉賣相好靚，有玫瑰花瓣喺黑豚肉上面，不過食味就食唔到清酒味，可能因為我用咗麻辣湯底，麻辣味蓋過咗清酒味。

脆肉鯇滾兩滾就食得，鯇魚小骨去清，大塊又爽脆，不錯！

打邊爐點可以冇丸，自製四式丸食咗蝦丸同墨丸，兩隻丸滾熟都好大粒，成個乒乓波咁大，要分好幾啖先食晒，兩種丸都好鮮味同彈牙。

黑腐竹以黑豆製成，感覺上好似比白色的更有營養，食味就同白色分別不大。

蔬菜拼盤顏色配搭好靚，唔會只係單一綠色，蔬菜有旺菜、生菜同皇帝菜，旺菜同生菜切成四分一棵，唔會一滾就散，設想周到。

餐廳冷氣感足但又唔會好凍，就算今日35度都食得好舒服，香港真係一個一年四季都可以打邊爐的好地方！