韓燒豬牛專門店

喜來稀肉以招牌菜護心肉聞名，護心肉於一隻成人豬身上產量較少，被視為珍貴肉類。近日好姊妹提起年多前曾嘗護心肉，有機會要相約我於工作附近試一次。上網搜尋，原來廣華街與煙廠街交界地庫有喜來稀肉分店，既然咁近，就相約平日夜晚韓燒一番。

當晚大概七點半到達所剩空枱已不多，估唔到咁多人同我地一樣不分季節都喜愛韓燒。入坐時侍應提示進食時間為90分鐘。

一坐低侍應已準備前菜三小碟、爐邊蛋、生菜及凍水。姊妹已急不及待食完一整碟泡菜，侍應亦即時添加。泡菜切得較大塊，鹹味酸辣味足，可以連之後的燒肉一齊食減油膩感。洋蔥圈味道不辣，味道腍甜。

餐牌有壹頭牛或壹頭豬的拼盤套餐，但我倆已一早諗定叫辣護心肉、真雪花牛肉同喜來稀肉，所以冇再諗。餐廳主要提供豬牛兩種肉類，唔似其他韓燒店有海鮮供應。

燒肉很快上枱，先嘗真雪花牛肉。雪花牛肉肉色紅潤，油花分佈平均，未經調味，一燒已經差不多全熟，放入口肉質軟腍多汁，似食和牛，難怪可以賣200蚊9件！

食完雪花牛，試試辣護心肉，護心肉顏色不太討好，切成條狀。護心肉比較厚身，要燒得較耐。辣護心肉入口不辣，反而帶有點點甜味，肉質爽口不油，柔軟但有嚼勁，真的是上等肉類！

喜來稀肉將牛肉薄切捲成花狀，由於比雪花牛切得更薄，幾乎一放上爐已經要翻轉，入口味道有點似打邊爐的手切牛肉，肉味較濃，與雪花牛相比感覺更抵食！

食韓燒中途來一口水冷麵立即暑氣全消，十分推介。

嫩豆腐湯中的豆腐真的十分滑溜，食咗咁多燒肉嫩豆腐顯得十分可口！

這裡的侍應當中，有一半以上係韓藉，但都聽得懂廣東話。雖然此餐廳主打豬同牛肉，但總體來說味道質素也不俗，值得一試。