樂天由客棧變身為經典

樂天由客棧變身為經典，大概係想呈現新菜單予食客一個全新的經典南洋菜式。翻開餐牌大部份舊有菜式依然保留，添加部份新菜式。

前菜栗子花生炆得好腍好入味。

大熱天時比較少煲老火湯，襯外出食飯叫咗個淮山杞子鮮螺頭湯。湯頭十分鮮甜，湯渣赤肉亦嫩滑可口，可以當多一個餸。一小煲湯估唔到都可以分到六碗。

兒時見到老爸整海參好多功夫，先用炭爐烤再浸再發，雖然依家有已浸發海參賣，但風味質感遠遠不及經傳統方法炮製的海參。自問冇心機用傳統方法炮製，海參唯有外出享用。樂天經典的砂煲花菇西蘭花扣海參中的海參滋陰爽口，件頭也不少，有六大塊。花菇亦大隻爽滑，菇味香濃。

古早咸香老鼠粉煲中的咸魚配搭小碟酸柑汁一齊上枱，侍應喺餐桌到上打開砂鍋蓋將咸魚同酸柑汁加入，連同生雞蛋一齊拌勻，入口咸香微酸滑溜。

樂天經典有特別甜品供應，揀選咗三色桂花班蘭糕，三色糕由椰奶、班蘭同桂花糕整成，一口咬下同時食到三種不同味道口感，班蘭同桂花香氣宜人，為晚餐畫下完美句點。