罕有同時提供意大利及西班牙菜的餐廳

印象中意大利菜等同薄餅意粉而西班牙菜就有tapas同海鮮飯，當知道觀塘有同時提供意大利及西班牙菜的餐廳時，心生好奇，想知係唔係咁典型嘅區分。餐廳位於鴻圖道同巧明街交界的愛琴坊內，格局有點似高級food court，沒有牆但有明顯店舖範圍。

餐牌上菜色分為前菜、小食、意粉、肉類，亦有二人套餐，沒有明顯意大利及西班牙菜的區分，不過我同大部分人一樣，最緊要食物好味，其餘不太重要。



從其他食評見唔少人都叫呢個紅色沙律，當日冇藜麥，改用薏米，薏米做沙律並不常見。所有食材如薏米、蘋果、松子仁都被紅菜頭染成紅色，口感亦十分特別，有薏米的煙韌、蘋果的爽脆、松子仁的香口、紅菜頭的腍甜，配搭係意想不到的驚喜。

西班牙黑毛豬火腿、白菌、芝士、炸薯球，外脆內軟，黑毛豬火腿帶來點點咸香。

大虎蝦、櫻花蝦、車厘茄、番茄蝦汁、手製意大利麵，最大驚喜係意粉汁，蝦味非常濃郁，食每一口意粉都可以感受到。手製意大利麵與一般機製的al dente口感有點不同，比較軟腍。

燒美國安格斯牛扒配燒蒜、紅酒燒汁，安格斯牛扒厚切近似牛柳，牛味香濃嫩滑，原個燒蒜香甜軟腍，最好就係一口安格斯牛一口燒蒜。

飲品選擇有點意想不到，有蜜糖蘋果醋同薄荷青檸梳打，食完濃味食物清清味蕾很合適。