樓上私房法國菜

近年開咗好多樓上私房法國菜，價格比一般高級法式餐廳便宜，氣氛亦較為輕鬆，但用料並不遜色。所以如果有心食法國菜，稍移玉步到樓上，就可以更抵價錢品嚐美食。

Le Paradis乃經姊妹介紹才認識，話四百蚊左右可以品嚐五道菜，主菜已有煎封法式油鴨脾。平日難得煮鴨同食鴨，聽落有點吸引，就揀平日避開人潮上來品嚐。

平日同假日人潮簡直就係兩個世界，姊妹話假日全場滿座，平日可以唔使訂位walk-in入內。

見到姊妹提過的五道菜晚餐，不過不太合口味，改為散叫。

枱面有兩樽有氣同無氣礦泉水選擇，但亦可以改飲免費熱水。

餐廳環境氛暗，很配合食法國菜的情調。

先叫上荔枝梳打解喝，梳打內有大量淺色荔枝味珍珠，珍珠非常脆口，好似食三文魚籽卜卜脆，食到中途已半飽。

牛油果鮮蝦沙律，鮮蝦煎熟發出鮮甜誘人香味，牛油果片全熟香甜腍身，沙律菜爽脆配上香橙檸檬汁很醒胃。

法式洋蔥湯中間有已浸腍法包，洋蔥絲香甜但依然爽脆，洋蔥湯洋蔥味道十分香濃。

黑松露磨菇湯有大量磨菇碎，加上忌廉同黑松露，磨菇湯入口幽香順滑，菇菌味道香濃。

紐西蘭刀貝蜆體型碩大，白酒辣椒煮得入味，扁意粉吸收鮮甜蜆汁精華，比刀貝蜆更吸引。

煎封法國油鴨脾皮薄脆肉嫩滑，鴨肉入口即溶，鴨脂酥味香濃，配上帶微酸的自家製雜莓汁，即時減去油膩感。

本來好想叫上一客甜品朱古力心太軟，不過之前食上太多珍珠太飽肚，唯有留待下次再品嚐。