龍蝦鮑魚粥底打邊爐

以前都聽過用粥底打邊爐，不過今次小肥牛用蒸氣石鍋先蒸蜆貝，再加龍蝦鮑魚粥底打邊爐。好友喜愛打邊爐，相約嘗新，估唔到大熱天時平日晚上全場滿座，侍應話人太多番唔到枱，等候期間眼見每枱都係叫龍蝦鮑魚粥底火鍋套餐，四人同行一人免費，免加一，每人唔使二百就已經有海鮮食，難怪有咁多人。


侍應手腳好快，等咗一陣就執好枱，先上調味架自行混醬。

海鮮盤出場，每人有半隻龍蝦、一隻鮑魚、兩隻海蝦、一件深海魚、一隻青口同一堆蜆貝。

首先開石鍋先蒸煮蜆貝，蜆貝有肉地，十分新鮮鮮甜。

跟著就落一半粥底滾熟龍蝦同鮑魚，龍蝦肉緊貼蝦殼，証明游水新鮮，肉質異常鮮甜彈牙。鮑魚亦游水新鮮，煙韌腍滑。



深海魚件同海蝦亦同樣鮮甜，海鮮最重鮮活，人流多食物流轉快，對食海鮮都多一點信心。

食完海鮮再加餘下粥底打邊爐，以前未試過用粥做火鍋，感覺上因為粥比較杰身，傳熱冇湯底咁快，食落冇咁熱氣，但同樣煮食物時好似唔夠熱咁，煮出嚟食物只有溫熱效果，有煮唔熟嘅感覺。我地將火鍋開到大火，加上草帽蓋同蒸，效果較為好一點。

花膠打邊爐未試過，花膠質數尚算不錯，大塊有膠質質感。百花釀鮮菇蝦膠亦彈牙。竹笙、鼠耳十分爽口。淮山滑中帶爽。油麥菜新鮮爽脆。最後食埋集合所有食物精華的海鮮粥剛剛好，海鮮粥份量亦不少，兩人足夠食飽。