新出和食料理

綿綿長雨，行街轉戰室內，希慎誠品有三層可以慢慢行慢慢睇，誠品對上兩層都係食肆，原來京林屋都搬上十二樓，店舖比之前略細，裝修跟之前差不多一樣，用木質的裝飾帶出簡約風。



門口見有新餐牌，有焙茶料理及鰻魚飯提供，可以食飯之餘又可以一次過食埋甜品，真係好方便。

金目鯛料理中的金目鯛非常肥美，皮下有一層脂肪，入口味道跟鰻魚有點相似，有蒲燒汁的甜甜鹹鹹，亦有肉質肥美嫩滑。料理中的米飯以朝薰焙茶代水烹調，令飯粒滲透點點茶香。料理中的麵豉湯唔會一味死鹹。醃蘿蔔亦酸甜爽脆，配金目鯛很合適。

林屋和食料理就最適合心多多的人，有照燒鯖魚、原粒帆立貝、蛋餅、芝士粒魚餅、八爪魚粒沙律等，每樣少少的，感覺上食物的配搭很傳統。

食完料理就到重點食抹茶甜品，抹茶啫喱雪糕簡簡單單，軟滑抹茶雪糕配上抹茶啫喱同食，香滑味美。

抹茶蕨餅每日新鮮製做，配上抹茶黃豆粉，口感清新煙韌綿滑，抹茶味比其他的抹茶製品都要濃郁，抹茶控不可錯過。

抹茶沙冰雪糕的沙冰打得一片片的十分幼滑，配上一球抹茶雪糕，溶化中的雪糕跟沙冰同食，香甜美味，忍不住一羹羹送入口中，最後被我一個人完全消滅。