驚喜粵菜

平日甚少經過中港城，除非搭船往返澳門。今次兩日一夜去澳門睇演唱會順便住吓新酒店，返到中港城都接近晚飯時間，就食埋飯先返屋企。老公話中港城平台都有好幾間食肆，上到去見到盈翠軒係食粵菜，時間尚早人客唔係好多，睇嚟都坐得幾舒服就入內就坐。

兩個人隨便叫上兩三個小菜。開茶隨口叫咗鐵觀音，鐵觀音比想像中好得多，最怕茶葉第一泡已經又苦又澀，第二三泡更加難飲，難得盈翠軒的鐵觀音茶色清澈，茶味雖不濃亦入口尚可，不其然對其小菜有點期望。

冰梅涼瓜有兩種老公最喜歡的元素：話梅同涼瓜。兩種味道好夾，甘甘涼涼，唔過蓋過另一種味道，睇嚟又可以偷吓師。

醬汁牛肋骨位上，牛肋骨炆得非常之諗，唔使用牙咬，入口即溶，牛味亦濃，上法用骨做裝飾亦見特別。

金柚手撕片皮雞皮肉分開，雞皮炸得十分薄脆，脂肪不多，令人食唔停口。雞肉拆絲配上金柚粒，咸香遇上清甜多汁，越食越開胃，老公仲教我用雞皮捲著雞肉同金柚然後一口食晒最美味。


魚湯龍躉班粒稻庭烏冬，有老公喜愛嘅稻庭烏冬，又有我鐘意嘅魚湯同龍躉班粒，簡直就係絕配。龍躉粒啖啖魚鮮，魚湯奶白鮮甜，加入滑溜彈牙烏冬清淡得嚟又好滋味。

我倆對今餐都十分滿意，將來再到中港城可以再試其他菜式。