回家優閒的感覺

居廬同浦東晉家門兩間都聽過，知道係食薄餅意粉飯同窩夫，依家再開多一間居廬晉家門，咁啱今次去開大南街基隆街果頭，經過見到，既然唔使花時間搵就見到，心諗不如又試一試。

居廬晉家門裝修好中式化，有傳統大門、仿古掛畫，但同時又有巨大水晶燈，中西合璧，mix & match，望落都幾順眼。平日客人唔係太多，餐廳又播放著音樂，感覺優閒寫意。

 

餐廳供應西式食品，叫咗頭盤法式暖卡開貝爾芝士伴炒蘑菇多士 。芝士用錫紙包著溫熱，食時切開芝士搽喺牛油多士上，芝士溫熱後微微溶化，味道不太濃，拌上蘑菇同多士同食都好滋味。


喺餐牌上見到自家製馬鈴薯丸配黑松露忌廉汁覺得好好奇，心諗risotto就食得多，不如又試吓呢個。馬鈴薯丸用薯仔同麵粉搓成，質感煙韌有嚼勁，令人諗起中國的貓耳朵。馬鈴薯丸本身無甚味道，要靠黑松露忌廉汁提味。黑松露好似會變魔術一樣，任何食物只要加咗黑松露即刻就會散發著獨特幽香。

另外亦叫上太平洋黑虎蝦意大利粉，虎蝦有兩大隻，已經開背，方便進食。虎蝦肉質爽甜，蕃茄汁意粉酸甜適中，傳統配搭總沒有錯。

餐後叫上玫瑰拿鐵享用，點點花瓣灑在拿鐵上，視覺滿分，入口順滑有咖啡味但不會太濃。
 
餐廳叫晉家門唔知諧音係唔係"進家門"，不過裝修上氣氛上覺實俾人一種回家優閒的感覺。