可以食落肚嘅玻璃盆栽

以前食過分子甜品，感覺係外表就好靚，呃like首選，不過味道就好一般。

好友有日又whatsapp美食靚相俾我，今次係zuc.cch.ero分子甜品，見到又拯救地球又para para sakura，除咗睇得，好友仲話味道都唔錯，摘日喺星期五下晝去開港島區順路去一轉百樂中心。

搭電梯去到18樓一打開門見到牆中間有中空玻璃可以睇到一排吧枱同師傅正在製作甜品，因為一個人關係，揀咗吧枱位置，既可以欣賞師傅製作甜品，又一個人坐吧枱好似型啲。





餐牌既有文字形容每種甜品，亦有相片睇到實物。經過一番思量，決定揀選Edible Terrarium。文字形容有原味咖啡或抹茶tiramisu，抹茶控梗係揀抹茶味。



見到師傅先整tiramisu底，中間放入手指餅同朱古力脆珠，跟著放上抹茶昆布，再插入竹炭蛋糕、風乾菇菌、朱古力薄片同最後嘅人形公仔。當放到自己面前，直頭係一件藝術品。

除咗人形公仔唔食得外，其他全部可以放入口，竹炭蛋糕同風乾菇菌口感乾乾地同tiramisu軟滑口感兩種極端，一齊食互補互助，設計得唔錯。

食甜品加18蚊飲咗杯baked apple with honey，香香甜甜幾好入口。

下次有機會同朋友上嚟要試吓其他比較大份嘅甜品。