型格街坊餐廳

街坊餐廳的共通點係大件抵食味道過得去可以當做飯堂, 不過為吸納中產新街坊, 新樓附近都會多開新式型格小店. 長沙灣本來屬於舊式純住宅區, 近來都開咗Casa 338呢類型格食店.

Casa裝修明顯有放過心思, 有塗鴉牆壁亦有酒樽作裝飾.



Casa 338夜晚有多款由幾十至二百幾的晚餐選擇, 亦可加錢揀跟餐小食, 同時亦有即開生蠔, 一網打盡所有街坊.

法國生蠔以重量分等級, N0為最重級數, 超過150克. 是晚法國Gillardeau N0生蠔38蚊, 蠔身碩大, 蠔肉肥美鮮甜, 海水味不太重, 非常合意.

跟餐沙律用油醋汁調味, 新鮮爽脆.

跟餐小食法式田螺焗薯蓉通常舊式餐廳先有供應. 田螺薯蓉入口綿密, 加芝士同焗加強濃烈奶香味.

主菜西冷牛扒可揀跟飯意粉薯菜, 意粉al dente, 西冷有趙頭又充滿牛味.

另一主菜香草忌廉汁三文魚柳, 三文魚皮脆但肉略為煎得過熟, 意粉本身煮得剛好但香草忌廉汁唔夠點.

加錢轉Cappuccino咖啡味足但入口不太順滑.