早少少餐廳

以前住彩虹, 最近既大型商場就係德福. 德福平台茜廊經常去食, 比茶記質素要好, 豉油西餐格局. 最記得就係早少少食午餐同早少少食晚餐系列, 果時賺錢能力唔高, 早少少食可以平啲梗係早啲食.

時光飛逝, 依家已經好少去德福, 茜廊好多年冇幫襯, 偶然得知原來茜廊已經分別喺天水圍、上水同樂富開咗分店.

人大咗成日都懷舊, 果日去開樂富都心思思想去幫襯茜廊.

早少少系列已經唔見, 茜廊裝修亦一去豉油西餐格局, 淺藍色木椅襯上原木色木枱, 變成有少少越南風摩登餐廳.

晚餐選擇多樣化, 連葡式燒BB豬都有, 不過果日唔係好肚餓, 怕食唔落, 所以叫咗肉眼扒同鰽魚.
Welcome drink甘荀橙汁都算特別.


羅宋湯蒜蓉包不過不失, 夠酸夠脆.


BB菠菜鮮蜆煮鰽魚個魚有驚喜, 鰽魚皮炸咗食落有厚度, 魚肉一梳梳有質感. BB菠菜少部份未煮放面, 其餘放喺鰽魚底, 份量唔少. 鮮蜆甜味入咗忌廉汁, 甜甜咸咸好冶味.

炭燒美國肉眼牛扒厚身香口, 外面有炭燒香味, 肉眼牛味濃郁. 配菜辣椒仔賣相不錯.

餐飲加錢轉特飲. 比利時朱古力雪香朱古力味香濃, 甜度剛好.