APM多元化冰室

茶餐廳冰室可謂香港飲食文化的一部分，從早年供應西多士絲襪奶茶，到近年全日供應的茶餐、鐵板扒、中式小炒、炒粉麵飯、魚蛋粉雲吞麵、雲南米線、喇沙等，極盡多樣化，基本上任何人去茶餐廳冰室都一定有啱食嘅嘢。

是日去Palace APM，旁邊金記冰室的侍應招徠客人，睇餐牌價錢喺APM屬低價位。既然冰室用膳上菜一定快，咁就可以快快食完入場睇戲。


睇過餐牌，原來金記已經開咗半世紀，屬港式懷舊冰室，今次以全新形象喺APM開店。二人用餐意屬叫中式小炒可以share食。中式小炒可以加25蚊轉餐送餐湯、白飯及餐茶。

餐湯可揀中湯或西湯。西湯羅宋湯味濃，入口酸中帶甜，味道對板。

無骨海南雞飯

無骨海南雞飯先上，無骨海南雞入口嫩滑，雞味不太濃但可點薑茸或黑豉油彌補不足。

馬拉盞炒西蘭花

馬拉盞醬帶有發酵蝦仔味，其他味道如辣椒或蔥頭蒜頭味較輕，應該係改良咗以適合港人口味。濃味馬拉盞配爽口西蘭花味道很合拍。

金記煎肉餅

煎肉餅等咗一段時間先上，即煎肉餅新鮮熱辣，非常香口。一碟煎肉餅有四大塊，每人兩塊剛剛好。

餐茶可加10蚊轉蛋白杏仁茶，如果同糖水舖的蛋白杏仁茶相比，金記的蛋白杏仁茶杏仁味較淡較稀，不過以餐茶作準則，杏仁茶太杰又似食甜品多一點，所以此杏仁茶尚算不錯，友人亦很欣賞，認為當不想飲奶茶檸茶時不失為一個好選擇。


用餐時見隔離枱叫上鐵板扒，鐵板熱辣辣，淋汁時發出吱吱聲，睇嚟都唔錯，下次可以試吓。