Cozy西班牙菜小店

平日好少踏足元朗，不過據聞元朗有唔少好嘢食，有機會總想有朋友可以帶我去見識一下。

是夜入元朗探朋友順到晚飯，朋友帶到嚟Granada一嘗西班牙菜。

由於時間尚早關係，客人唔係太多。寧靜環境加上輕音樂，可以與朋友放輕鬆詳談。
 
晚餐有set dinner亦可叫肉類或意粉加錢轉餐，我地每人叫咗一個餐。

南瓜粟米湯
 
南瓜湯南瓜味道香濃幼滑，粟米粒加入於湯中增添口感。

黑松露釀西班牙豬卷伴薯菜
 
西班牙豬卷份量十足很厚身，肉質外脆內軟，香口味濃。黑松露份量恰到好處，幽幽的香氣提升豬卷味道。點食用的茄汁加有茄蓉，而沙律菜亦加有黑醋，酸咪咪的非常開胃，很不錯的一道菜。

蟹肉蟹膏意粉
 
蟹肉蟹膏份量很多，每條意粉都沾上蟹肉，蟹膏充分混合喺意粉當中，令意粉帶有濃濃的鮮甜蟹味。

燉牛面頰粒配南瓜蓉
 
牛面頰的鹹味配上甜甜的南瓜蓉，增加味道的層次。牛面頰肉質燉得很腍，入口即溶，充滿膠質，令口感豐富度提升。根據餐廳老闆所講，燉汁用上洋蔥、甘荀、紅酒、牛骨等煮最少三日而成，牛面頰加入燉汁後煮大約三小時然後收汁，可以想像肉汁的濃縮鮮甜味。友人對此道菜非常欣賞，尤其是廚師對食物的執著。

朱古力布丁
 
甜品其中一個叫上較特別的朱古力布丁，配有一片烘乾蘋果。布丁面鋪滿Oreo朱古力餅碎，布丁朱古力味十足，不會太甜太膩。

餐廳定價不貴，百多至二百蚊就可享用西班牙美食，比市區更經濟實惠。

星期五至日晚九點半後有beer and wine happy hour。