港島區的正宗泰菜

如果食泰菜，第一時間會諗到去九龍城。九龍城因利乘便，附近可以入到由泰國飛機運到的原材料。友人介紹金蘭花喺灣仔同銅鑼灣各有分店，材料亦係由泰國入口，口味正宗。喺九龍城食得多泰菜都有興趣試試其他區域的泰菜館。

雖然地址寫喺怡和街，但大廈入口其實喺渣甸街，友人與人都搵咗一陣先上到去。

平日夜晚食客頗多，難得尚有一張卡位。樓面只有兩位侍應，人多時有點應接不暇食。店裝修很可愛，門口牆壁畫上一位少女滿面笑容坐上飛馬，很可愛活潑，就好似泰國人的樂天開朗性格一樣。

叫上好幾款泰菜常見菜式。

海南雞飯

很大的一碟海南雞飯，如果一個人食應該食碟飯就夠飽。海南雞無骨很嫩滑，雞皮不厚可以連皮食，點泰式雞汁微辣簡直就係絕配。香飯不太油亦帶有香味。

泰式炒椰菜苗

椰菜苗與平日所見略有不同，椰菜苗唔係一棵棵而係已經摘成一塊塊菜葉，味道鹹香惹味。因為有不少辣椒碎關係，越食感覺越辣。

臭草煎蛋

以我認識的臭草係用嚟煮綠豆沙，此菜式相信十分地道，臭草用嚟煎蛋與一般菜冇咩唔同。點食醬汁味道好似中式蝦醬，為菜式帶來點點鹹鮮味，不過此道菜如果上枱能夠熱辣辣相信食味更佳。

炸蝦餅拼魚餅

蝦餅與魚餅各有兩件切半，蝦餅很厚身，蝦肉彈牙爽口。魚餅魚味濃郁，香料味亦重。

椰汁糕

最後叫上四件椰汁糕，椰汁糕用膠兜盛載，而唔係一般所見用蕉葉，不過並無影響食味。椰汁糕清甜，下面有椰青肉碎很爽口。

當晚見到有泰式邊爐，賣相很吸引，與友人約好下次定要一試。