小清新韓式食店

天氣轉涼時總會想起韓式美食如炸雞、薯仔排骨湯、泡菜湯、部隊鍋等。旺角兆萬的Yadllie Plate已知開了一段時間，朋友介紹食物都不錯，就襯今晚去開旺角辦理事務順便一試。


Yadllie Plate與其他兆萬食店環境有點不同，光潔明亮，裝修有小清新感覺。


每張枱都有按鈴可以呼喚侍應，USB插頭又可隨時為手機叉電，裝修上小小的注意都令人感到關切食客。

餐牌猶如一份號外。

芒果菠蘿mocktail好清甜易入口，兩人飲一渣唔覺多。

驚喜二重奏有半份原味炸雞及安格斯肉眼。安格斯肉眼上枱時入面未完全熟透，侍應放在鐵板上由食客控制生熟程度。

等肉眼熟透時先食炸雞。根據餐牌所講，餐廳選用35天嫩雞醃製72小時配合2度低溫熟成。炸雞外皮好薄，香脆可口，雞肉非常嫩滑，就算雞胸肉亦唔鞋，每人兩件真係唔多夠。

食完炸雞，肉眼已完全熟透。肉眼已事先切開一件件，入口係意想不到的肉味濃兼嫩滑，比很多標榜用安格斯牛做得更好。

炸雞下面的炸薯角薯肉多又香脆。

海鮮部隊鍋材料好豐富，有午餐肉、煙肉脆皮腸仔卷、鮮蝦、青口、蜆、京蔥、西蘭花、椰菜、年糕、通粉等，每樣份量少少，兩個人食唔會好飽。部隊鍋湯底不錯，少辣有泡菜海鮮味。食完部隊鍋唔少得部隊鍋的好朋友辛辣麵，煮辛辣麵唔落味粉都好夠味。

Oppa炒野菜材料亦非常豐富，有露荀、磨菇、甜椒、粟米芯、椰菜絲、椰菜仔等，配上大量黑椒烹調，入口味道好濃烈合重口味人士。

草莓雪冰上面有一球草莓雪糕加草莓片佈面，入面雪冰刨得很幼細，入口即溶。雪冰為重口味的一餐清清味覺。