南洋風味小菜

去開大角咀如果食埋晚飯的話，總會諗起奧海城的樂天經典，佢南洋風味菜式味道比較濃烈，大熱天時食會提升食慾。

是夜到達好多人，等咗一陣間位。

想叫古早咸香老鼠粉煲但侍應話已經賣晒，有少少失望，唯有叫其他菜式。

前菜由栗子花生變成炆花生，花生依然炆得好腍好入味。

蝦醬雞中翼細碟都有八大隻，雞翼新鮮炸起好熱好脆，蝦醬咸香味濃，一定要叫白飯伴食。

金銀蛋浸莧菜，肉碎同金銀蛋比莧菜更多，肉湯味道好鮮甜，味道入晒落莧菜，下次要叫中size等可以有多啲菜食。

乾貝菜膽竹笙燉湯肉湯味道好濃，反而菜膽份量味道不多，變成好似飲一般肉湯，如果自己煲的話一定會多放白菜，味道會比較清鮮。湯渣赤肉雞腳肉質嫩滑可口。一煲湯可以分到六碗份量。


四大天王有秋葵、四季豆、蜜豆同茄子，好高纖維亦好爽口，醬汁味道較濃，適合送飯。

甜品今次揀咗酸柑香茅凍同楊枝甘露。啫喱有好重香茅味，感覺好清新，好配合南洋風味小菜。楊枝甘露芒果柚子肉份量適中，甜甜的很惹人喜歡。