馬拉版澳牛 - 喇沙、海南雞飯專門店

去完皇室堡地庫GU買衫，近近地喺隔離Mee...Lemongrass食碗喇沙當晚餐。Mee...Lemongrass真係好多人，平日夜晚都要排隊等位，好彩人流快，好多人當食快餐咁食完就走，我地等位期間順便睇埋食乜。

枱面面積好細，唔想叫咁多嘢食，簡單叫兩碗喇沙加兩杯飲品，甜品後上。侍應行動好快，食品好快秒速上枱，感覺好似去咗澳牛一樣。

Mee...喇沙用上油麵同米粉，湯底味濃但唔辣，材料有大蝦、蜆肉、蟹柳、魚蛋、豆卜、雞絲同雞蛋，用料豐富但不算正宗。

無骨海南雞喇沙用上兩種餐廳主打海南雞同喇沙，喇沙濃味蓋過海南雞味道，海南雞相對顯得味薄，似乎海南雞同油飯先係絕配。

泰式豆奶紫米冰，泰式豆奶豆味香濃，味道少甜，紫米煙韌，但飲完紫米之後豆奶相對味淡。豆奶紫米冰份量很多，感覺好抵飲。

Cool爆鮮芒果冰冰亦係味道少甜，但飲飲吓亦有味淡感覺。兩個人好努力結果都飲唔晒。

馬來脆雪山由馬拉師傅親自主理兼奉客，馬拉師傅笑容很親切，感覺比其他光速侍應好得多。以前喺新加坡小印度食過類似食品，馬來脆雪山用料簡單，入面有煉奶花生碎平均分佈。馬來脆雪山很高，whatsapp俾朋友個個都問咁高係咩，呃like首選！雪山餅皮脆口但因為有煉奶關係整腍咗少少，味道少甜好入口，兩個人又係要好努力先食晒。