再會韓食

上次食過烤雞同烤牛肉韮菜餅後覺得唔錯，今次同老公嚟開銅鑼灣又上去回味一下。

Bingo & Cook位置十分便利，位於銅鑼灣港鐵站C出口對面，一過馬路就到。

估唔到平日夜晚都咁多人，目測有八九成滿，加上不停播放韓歌，感覺有點嘈吵。


夏日炎炎先上飲品解渴。乳酪沙冰味道好似飲得嘅原味乳酪一樣，酸中帶甜，鐘意食原味乳酪嘅就一定會鐘意呢杯沙冰。

韓式原味無骨烤雞上菜時有已調味沙律菜、已醃紅菜頭條同唔同嘅調味醬一齊上，沙律菜同紅菜頭味道酸酸甜甜好開胃。無骨烤雞上面有一層薄薄的芝士，唔會太多啱啱好，烤雞雞肉好嫩滑亦好入味。烤雞旁邊有兩個新薯同兩舊粟米，新薯十分熱辣粉嫩，烤粟米亦好鮮甜。

海鮮蔥餅粉槳好薄，魷魚同蝦唔會切得太細碎，份量同蔥、洋蔥甜椒等一樣咁多，烤過後十分香口。海鮮蔥餅煎好後切成一件件方便分享進食。

牛肉炒粉絲有好多材料如牛肉、本菇、冬菇、洋蔥、甜椒等，韓國粉絲較粗身，味道不太濃很清怡。