會為牛筋再來

上次同好姊妹喺希爾頓大廈晚膳，見到位於地庫的鐵牛大排長龍，記著了名字，想著有機會再去尖東就要一試。

是夜約咗老公喺尖東等，由於時間比較夜，唔使等位，但餐廳都差不多全滿。

餐廳有人安排坐位，然後畫紙出去收銀俾錢叫嘢食。

近年如果食碗粉麵的話，多數會揀牛筋河，因為牛筋含有豐富的膠原蛋白， 脂肪含量比牛腩低， 而且不含膽固醇。不過要遇上上等牛筋真的可遇不可求，牛筋一係炆得太腍，一係就炆得唔夠火喉，又或者清潔得唔乾淨，仲有好多毛髮。

今晚嚟到鐵牛，當然要一試牛筋腩麵，牛筋腩麵牛筋比例不多，牛腩半肥瘦，炆得軟腍適中，湯底濃郁但沒有甚麼藥材味，麵底不軟不硬，沒有太深刻印象。

反而碟淨牛筋甚有驚喜，牛筋很大很粗，直徑有一蚊銀咁大，炆得火喉十足，唔會太軟或又硬，煙韌彈牙，表面亦清潔乾淨，係近年食過最好的牛筋，我一個人差不多食晒成碟。香鹵滑牛筋份量甚多，甚至比牛筋腩麵餸的份量更多，下次可以叫淨牛筋配米飯。

老公的主廚私房牛肉麵同紅燒牛筋腩麵材料味道分別不太，除咗多咗一舊牛展，不再重複。

魚酥皮蛋豆腐上面有好多木魚片，底下的醬汁濃濃的帶有甜味，令豆腐不再淡口。

鹽酥小拼盤有黃金梅子脆薯、酥炸花枝丸同鹽酥雞，其中炸番薯條上面灑上梅子粉，梅子粉酸甜味引出番薯條的清甜粉腍味，很不錯的小食。

肉燥拌青菜甜甜的肉燥令生菜更加鮮甜爽脆，伴飯伴麵伴肉食小食很匹配。

叫上主食加16蚊就可以選擇特飲，芋香珍珠奶茶淡淡的芋香奶茶唔會太甜，珍珠細細粒煙韌彈牙。檸檬冬瓜茶的冬瓜茶底亦不太甜，加上幾片檸檬帶有清新檸檬香味，食完濃味台灣麵食令人感覺舒服。