高級日式放題

好友乃團購高手, 經常以較低價錢享用正價美食. 今次佢有兩張四季.悅團購, 正好果日老公約咗朋友聚舊, 時間夾啱一齊去大食一餐也!

唔講唔知原來四季.悅位處金鐘都有做放題. 食放題通常唔係旺角尖沙咀銅鑼灣就係屋村商場, 環境衛生認真麻麻, 想價錢平一係好早食, 一係去到宵夜時間食. 難得四季.悅放題做六點至十點冇時限, 可以慢慢食傾吓計, 雖知香港地好難有地方可以坐耐少少又唔俾人趕走!

 
是夜六點半去到都已經人聲鼎沸, 完全想像唔到身處金鐘.

放題有四洲粒粒橙汁或蜜桃茶任飲, 橙汁同蜜桃茶唔會好甜飲得過.

每人送上磯煮鮑魚同燒羊架. 磯煮鮑魚令肉質保持鮮嫩彈牙, 又可讓濃郁的湯汁包裹住鮑魚.

燒羊架有少少羊脂香味十足.

先叫前菜熱熱身, 牛蒡漬用上較幼身日本牛蒡, 入味又爽脆, 我地每人都食咗兩碟.

凍豆腐四四方方一啖入口又凍又滑.

東風螺好細粒不過都醬油味濃.

刺身只叫咗油甘魚同石垣貝. 油甘魚口感柔軟細滑, 入口甘香, 油份豐滿, 係食刺身必然之選. 石垣貝厚肉爽脆彈牙, 中和油甘魚厚重感.

壽司比刺身更吸引, 海膽壽司新鮮鮮味十足, 三文魚籽壽司充滿光澤, 入口煙韌得來一咬即破, 滲出點點甜香. 帆立貝壽司鮮甜帶子味濃. 蔥吞拿魚腩壽司較淡身, 但口感軟滑.

燒物有少見的蒲燒鰻魚同西京燒銀鱈魚. 蒲燒鰻魚香甜可口, 西京燒銀鱈魚用上白味噌烹調, 口感偏甜, 燒後油潤十足.


燒京蔥結實爽口, 惹味香濃. 燒菠蘿厚件清甜多汁.

 
天婦羅蕃薯麵衣脆口, 熱辣粉甜. 天婦羅軟殼蟹蟹膏豐厚蟹殼薄軟.



最後食到每人一客的脆皮朱古力雪條同杏仁豆腐做甜品, 捧腹盡興!