香港首間鳳雛分店

韓國除咗炸雞出名外, 仲有冇咁熱氣嘅安東燉雞. 上次去開明洞本來都想一試鳳雛燉雞但結果冇去到, 返到香港後知道佢喺旺角開咗香港第一間分店, 又相約同行好友一嘗鳳雛燉雞滋味.

餐廳用上銅製餐具, 有食韓餐風味.


前菜好特別, 並唔係泡菜, 而係黑豆松子仁、甜辣魷魚絲同海帶. 食完仲可以添加!

青提梳打同檸檬梳打有好多果肉喺底, 大大杯好飲又解渴.


未上主菜前, 侍應先奉上贈送嘅書簽同圍裙, 真係幾有心思.

芝士雞蛋卷比例紮實, 唔係滑蛋質地, 中間夾有半溶芝士, 上面再有芝士絲同沙律醬, 食落酸酸甜甜唔會漏.


菜包韓式辣炒豬肉要襯熱食, 熱食有韓燒包菜嘅感覺. 菜下面仲有薯蓉同紫菜飯團, 成個菜好飽肚.

鳳雛燉雞細份少辣, 冬粉比我地中國嘅紅薯粉更加煙韌, 要好牙力先可以咬開. 配菜如紅蘿蔔青瓜洋蔥好入味, 反而最先食完. 雞塊脾位嫩滑啲胸位比較鞋.

 

 
食完三個主菜已經飽到上心口. 餐廳菜式份量頗大, 人多食會好啲.