令人有幸福的感覺

一向喜歡食麵包多於蛋糕, 因為麵包比蛋糕少花巧, 少忌廉等其他裝飾, 食落肚有實在幸福的感覺, 當然凡事總有例外......

好友有兩張免費電影飛, 上演影院不多, The Grand Cinema係其中一間, 位置上圓方比較方便, 就相約喺圓方等.

劃位後尚有時間, 戲院旁有兩間餐廳, 睇餐牌後選擇咗The Pantry.

The Pantry裝修很清新, 感覺上很健康.


安坐後同時奉上紙餐牌及平板電腦. 平板電腦食物照片未齊, 而且部分功能如埋單暫時未能使用.

二人食量不大, 先叫兩客主菜, 稍後再叫甜品.

Burrata Chorizo配搭不俗, 有burrata芝士、西班牙香腸及車厘茄. 柔軟新鮮的Burrata芝士外觀同質感與Mozzarella相似, 入口軟綿綿又有嚼勁, 配上咸香西班牙香腸及多汁的車厘茄濃淡得宜.

Calamari Squid Ink Pasta的芥末忌廉汁、青檸汁及蕃茄沙沙令菜式微酸, 有清新的感覺.

當叫甜品時, 睇見The Pantry's Pancakes用上餐廳名字, 想必是招牌菜, 叫後滿心期待.

The Pantry's Pancakes上枱時, 三件厚班戟震動著, 好像很鬆軟似的.

當第一口品嚐厚班戟時, 真的不得了, 感覺似食梳乎厘, 味道又似燉蛋白, 有少少糖霜放面, 焦糖牛油不太多, 配上清新雜莓同焦糖香蕉, 食上居然有平日食美味麵包的感覺, 令人感覺到幸福.

當晚每當想起班戟時依然有開心的感覺, 誠然120元絕對不便宜, 但為了美味與幸福還是值得的.