中國連鎖式小籠包專門店

以前上去深圳食過金牌小龍, 印象中小籠包生煎包做得不錯. 經友人告知原來香港都有分店, 上網睇過價錢不貴, 絕大部分食品價錢不過百元, 可以一試.

尖沙咀iSquare店舖面積好大, 不過晚飯時間都係要等位.

去小籠包專門店當然要食小籠包, 佢除咗有傳統小籠包外, 都有五色小籠包同豆沙芋泥朱古力等甜食小籠包.

蟹黃小籠包除豬肉餡外另加蟹黃, 蟹黃味道唔算好出, 但食得出餡料鮮甜多汁, 小籠包外皮比一般煙韌唔容易穿.

五褔小籠包做緊特價38蚊, 五色有墨魚海鮮、櫻花蝦、抹茶雜菌、蟲草花同咖哩雞, 每種小籠包都食得出果種味, 唔只得個顏色, 真係好新奇得意.

香菇花素蒸餃外皮煙煙韌韌比想象中好, 香菇素菜切成細細粒好清爽, 唔係素食者都啱食.

元盅燉湯有雞湯或茶樹菇排骨湯, 雞湯真材實料, 湯色清澈, 感覺好滋補.

什錦土豆絲好有中國色彩, 有海帶絲同豆干絲, 略帶咸味幾清爽.

黃金大蝦係大蝦走油後再用咸蛋黃炒, 自己整要花好多功夫, 買半斤大蝦已經差不多係呢個價錢, 所以個餸幾抵食. 咸蛋黃包裹著每隻大蝦, 咸香惹味, 做得不錯.

餐牌上除咗小籠包外, 仲有好多其他種類食品, 下次要試試.