農圃飯店副線

有朋自遠方來, 下榻於灣仔帝盛酒店. 據知酒店內中菜館有新張優惠, 只要喺FB like及share, 即有一疊優惠券, 於晚飯時每消費滿200蚊可用一張100蚊券, 最多可用五張. 又或者可即時享有八五折優惠, 二選其一. 既然朋友想試試該中菜館, 又有折扣優惠, 就相約晚膳一聚.

圃公館原來係農圃飯店副線, 咁當然要一試農圃名菜糯米雞翼, 取價68蚊一隻當然並不便宜, 但將糯米炒熟再釀入拆骨雞翼炸熟乃高難度傳統功夫菜, 貴一點都要一試. 糯米雞翼表皮炸至金黃色, 外表飽滿, 賣相十分吸引, 既可食到香脆雞翼, 入面糯米飯又軟硬適中, 具有雙重口感.

蜜豆乾煸鮮鮑將鮮鮑切半與蜜豆同炒, 鮮鮑軟硬適中又入味, 蜜豆飽滿爽口, 不過如果鮮鮑份量可以再多一點更好.

百花煎焗羊肚菌, 羊肚菌乃珍貴菇菌, 釀上百花感覺上很貴氣. 百花結實彈牙, 羊肚菌有輕輕的菌香味, 配搭不俗.

黑松露和牛炒飯飯粒炒得夠火氣又乾身, 細碎黑松露和牛粒融入其中, 食得乾淨清爽.

菜館位於一樓, 落地玻璃設計可眺望跑馬地車水馬龍境況, 朋友覺得新鮮好奇, 認為乃香港特色!