巧手製作私房菜

樓上私房菜一般都會比連鎖式酒樓多一份心去製作每一道菜, 所以如果有朋友介紹試過覺得食得過嘅私房菜, 我都樂於一試.

據聞榮哥私房菜前身係三姐, 菜式類似, 不過三姐我未食過, 就當係新食店好了.

之前已訂位訂菜, 知道榮哥自家種沙律菜. 第一道菜就已經係有機沙律菜拌芝麻醬, 沙律菜好新鮮, 配上濃味芝麻醬完全唔覺有青草味.


自家醃製青瓜蘿蔔同涼拌黑木耳應該係即日製作, 唔會好酸, 輕輕醃過, 容易入口.

茶燻流心蛋拌黑魚子醬配厚切茄子, 流心蛋黃蛋味濃郁, 蛋白外層有茶燻過的味道. 厚切茄子走油後再放在濃味汁上, 自是惹味.

清蒸南非鮑魚肉質彈牙, 用陳皮絲清蒸帶出鮮甜味.

原盅姬松茸淮山甘荀黑毛豚肉湯有著濃濃姬松茸清鮮菇菌味.

蝦球水芙蓉底下應該係蒸蛋白, 蛋白香甜滑溜, 上面黃色汁液有著雞湯的味道. 蝦球肉質爽脆.

冰梅黑豚肉排骨冰梅酸酸甜甜可惜黑豚肉脂肪少肉質較硬, 用腩排效果會較好.

米王湯浸碧綠溫室菜苗, 米王湯有著魚湯影子, 但濃香道較輕, 唔會蓋過菜苗清鮮味.

荷香蒜蓉海斑片原籠蒸鴛鴦飯最欣賞香米紅米味道, 香米有絲苗米香紅米煙韌. 此蒸飯冇落其他醬油全靠蒜蓉同斑片味道沁入米飯.

  

炸薯球做得小巧精緻, 內有紫薯蓉. 作為飯後甜品十分完滿.