山林道後巷的串燒小店

有一排冇食過串燒, 又心思思想食吓. 有朋友介紹原來山林道都有串燒專門店, 是夜專程去到串酒里一嚐串燒.

小店位於山林道後巷, 分室內同室外位, 大熱天時想坐室內, 不過坐位唔多, 大約四張枱左右, 要等位, 留咗電話就喺附近行逛.

終於過咗十幾分鐘後收到電話, 小店室內冷氣非常大, 就算夏天食串燒都無不可.

見到推介有火炙皇帝蟹腳、火焰叉燒同雞蛋燒蠔比較有特色, 其他都每樣叫啲試吓.

鹽燒秋葵同川式虎皮椒燒完仲有水份喺入面, 唔會太乾又爽口.



秘制汁燒鮑魚啲秘制汁已經入晒味落鮑魚度, 有咬口同彈牙.



金菇同牛肉永遠係最好配搭. 爽口金菇加上濃香牛肉, 一口食落肚感受不同口感.

 

脆燒日本鰻魚皮脆魚肉油脂香濃.



惹味燒魷魚鬚幼身有咬口, 送酒最佳.



日本雞蛋燒廣島蠔生雞蛋茄汁連蠔一口吞入口嫩滑惹味, 原來呢兩樣配蠔都幾夾.
墨西哥辣燒粟米墨西哥辣汁配清甜粟米好辣好刺激.



火焰叉燒先淋上玫瑰露再點火, 玫瑰露酒香非常濃郁, 叉燒半肥瘦軟身肉味香濃, 全晚呢個最好食.



火灸皇帝蟹腳份量唔少, 不過燒過後比較乾身, 鮮味不及凍食.



黑胡椒燒雞翼皮脆肉嫩, 串燒佳品.



黃金蒜蓉燒虎蝦蒜蓉份量唔係好多, 不過蝦肉鮮甜彈牙, 食到原汁原味.



總括串酒里串燒調味適中, 蒜蓉孜然味道唔會蓋過食物本身味道.