觀塘人氣美式菜

今晚又到觀塘區覓食, 從Openrice得知Moreish & Malt打入六月份好評餐廳十強, 既然有咁好嘅評價, 當然要試一試!

入夜後鴻圖道沿路都好靜, 唯有呢間餐廳好多人好熱鬧. 安坐後不久, 侍應已放下餐包同一碟油醋, 餐牌非常簡單, 食物一張飲品一張, 叫咗食物飲品後就滿心期待.

餐廳標榜提供美國菜式, 經理及部分侍應係外籍人士, 喺觀塘區比較少見. 門口見到有扭珠機, 賣酒嘅地方有部扭珠機可愛中又好似有啲茅盾.



香草麵包質感軟熟, 點油醋食味道不錯, 雞尾酒Raspberry Mojito用冧酒、青檸、薄荷、紅桑子及糖槳混合而成, 飲落酸甜清涼好適合夏天飲用. 剛剛八點前落單仲可以享有Happy Hour價錢.





等候不久吞拿魚藜麥沙律就到, 吞拿魚塊外皮略煎, 內裡依然鮮嫩滑溜, 炸藜麥配上吞拿魚加強口感, 沙律菜混上濃濃黑醋汁酸味十足. 此前菜十分開胃味濃.



美國穀飼有骨豬扒油水充足, 切開少有的鮮嫩可口, 炒什菜有菜心、蜜豆、蘑菇, 菜心中式炒法, 入口鮮甜無渣, 中式菜心配西式豬扒配搭十分新奇.

 

大蝦扁麵配碎蝦乾白酒汁, 扁麵吸滿濃濃的白酒味, 淨食都十分可口, 大蝦爽口碎蝦乾釣起鮮味.
此餐廳菜式口味有其獨特性, 味道比較濃郁, 難怪吸引到不少食客!