貴精不貴多

香港人酷愛海鮮，君不見自助餐中最受歡迎永遠都係凍海鮮如生蠔、蟹腳、麵包蟹、龍蝦、刺身等，閒閒地可以食幾碟。不過當問到味道時，通常都係鹹鹹地冇咩味。既然如此，倒不如以同等價錢食得精一點，人的胃口有限，要善待自己。

朋友介紹尖沙咀蠔灣有新鮮運到海鮮，可以自選成拼盤，出餐前會再逐一挑選務求保證新鮮，家人都十分喜愛食海鮮，鯉魚門式的中式海鮮既然已經食過，又帶父母一嘗西式海鮮。

點菜前先叫飲品，父母少喝酒，就叫上果汁好了。果汁有好幾種，有蘋果、番石榴同什莓，每樣都叫上一個，讓他們選擇。

海鮮拼盤選上十二隻的生蠔拼盤，今天的指定生蠔係Honey Point同La Perle Noire。Honey Point體型較細入口creamy海水味輕一點。La Perle Noire體型較大海水味重蠔肉亦較脆身，連蠔水一起喝下肚感到清鮮蠔味。


跟著試上車厘蜆，車厘蜆並不多見，蜆味濃郁，肉質結實厚身，食後口中留有濃烈甜味。

北海道紫海膽原隻上，比一般一板板的海膽新鮮得多，亳無腥味，入口即溶，父母甚少食活海膽都覺得味道不錯。

北海道帶子另外分開上，帶子厚切，珍寶級數，一粒切開兩半，肥嘟嘟的啖啖肉，諗身甜滑，比日本餐廳的帶子刺身的質素還要好。


食完一輪凍海鮮，總要叫點米飯給父母暖暖肚。燴波士頓龍蝦意大利粉叫上標準份量，龍蝦已去殼剝肉，方便進食，扁意粉用忌廉汁去燴，加上點點即磨胡椒，味道甜美。

非洲虎蝦意大利飯起肉與意大利飯同煮，剩下頭尾作裝飾。意大利飯略帶硬身，喜不喜歡見仁見智，配上彈牙蝦肉同點點蝦膏，此飯酸酸甜甜確實可取。

本來想一試甜品海膽雪糕，但食完意大利飯已十分飽肚，只好留待下次再嘗。