新奧爾良的船長

一聽到The Captain's House的名字，首先會聯想起海鮮，餐廳亦是以海鮮作主打，尤其是熱船長海鮮拼盤，自選海鮮加上薯仔、肉腸、粟米及自選醬汁，一齊放入袋搖勻，成為一道誘人美食。

好友快要生日，正在思量在那裡慶祝，赫然發現原來之前想食熱船長海鮮拼盤，但與好友從未食過，事情變得簡單，只要訂枱就是了。

The Captain's House位於厚福街H8，樓層面積不大，坐位不多，訂枱比較穩陣。

餐廳裝修變化不大，都是以海洋裝飾為主，招牌龍蝦公仔隨處可見。



克里奧爾海鮮濃湯

好友喜愛熱食，就以海鮮濃湯作第一道菜。此海鮮濃湯以迷你鍋送上，內有不少米粒，再加上秋葵粒、魷魚、鮮蝦等，相當濃杰飽肚，二人共享較佳。

蠔周打湯

蠔周打湯雖不見蠔的踪影，但湯內有很重蠔味，濃甜不腥。周打湯多是配蜆或其他海鮮，配蠔很少見，但配蠔味道立即提升不少，實在不可錯過。

柚子大蝦沙律

食海鮮拼盤前先嚐沙律清一清腸胃，雜菜沙律清新爽脆，柚子肉鮮甜多汁，大蝦肉質鮮甜彈牙。

熱船長海鮮拼盤

此拼盤是最少的份量，可揀選三款海鮮，好友選了松葉蟹腳、翡翠螺及八爪魚仔，加卡薑蒜蓉汁。松葉蟹腳有四隻，用鉸剪可輕易去殼，整條蟹腳肉點上卡薑蒜蓉汁，香辣惹味。翡翠螺比蜆或青口肉質更加豐厚，吸滿辣汁入口爽口彈牙。袋內原個薯仔、肉腸、粟米份量不少，食罷十分飽肚。

露絲瑪莉香草包

香草包切成方粒形狀，外脆內軟，本身已帶淡淡香草味，點上海鮮袋辣汁，可連辣汁亦不放過。