平食即開生蠔

依家平食生蠔有好多蠔吧可以選擇，比去自助餐排隊同人爭好得多！好友介紹山林道尾有餐廳做緊二百蚊一打生蠔連一支白酒，襯周年記念同老公二人平食即開生蠔。

餐廳位置非常隱蔽，行到山林道尾原來要轉右沿樓梯直上，餐廳開喺住宅地舖，自成一國，有柳暗花明又一村的感覺。


 
時間尚早關係，人客不多，感覺非常幽靜。老公當日唔太想飲白酒，改叫兩杯葡萄梳打配生蠔，葡萄梳打味道略甜，當冰開始溶解減低甜度較易入口。

見到差不多每枱客都叫生蠔加白酒，我地都唔例外。精選生蠔即叫即開，眼見應該有好幾款蠔，生蠔體型中等，肉質爽脆，海水味濃，以平均十二蚊一隻真係食得過！

沙律拼盤份量可以幾個人分嚟食，沙律菜以黑醋調味，上面分別放有煙三文魚、大蝦同巴馬火腿。沙律通常只配一種肉食，今次有三種實在好豐富，令人胃口大開。

一連食咗兩款凍食，跟著叫番熱食暖肚。黑松露牛肝菌薄餅呈現長形，批底不厚不薄，上面加上的黑松露令整個批味道十分幽香，再加上芝士同牛肝菌材料簡單但味道十分吸引。

當晚本來想叫蒜蓉焗翡翠螺或白酒煮馬拉蜆，但兩樣都冇貨，只好改叫白酒煮紐西蘭青口。青口不屬於體型嬌小的藍貝青口，種類近似本地青口，體型較大兼肉厚。青口吸收白酒辛辣味後肉質更加鮮甜嫩滑，十隻青口每人五隻好快就食晒！